ညသန်းခေါင်ချိန်လောက် ရှိပြီဗျ။
ဝပ် ထရိန်း ဝပ် ထရိန်း ဝပ် ထရိန်း
နွားတွန်သံကြီး ကြားနေတာ။ ကျုပ်လည်း အိပ်ပျော်နေရာက လန့်နိုးသွားတယ်။ အဘနဲ့အမေလည်း လန့်နိုးသွားကြတယ်။
ဘယ်သူ့နွား လွတ်နေတာလဲ မသိဘူး။ စောစောကတည်းကကြားနေရတာ၊ ရွာမြောက်ပိုင်းကစပြီး ကြားရတာ။
အမေက အဘကို ပြောနေတာဗျ။
ဝပ် ထရိန်း ဝပ် ထရိန်း ဝပ် ထရိန်း
အခုကြားရတာက ကျုပ်တို့ဝိုင်းရှေ့ကဗျို့။ ကျုပ်အဘအိပ်ရာထဲက ထလာတယ်။ အိမ်ရှေ့မှာ ကာထားတဲ့ သစ်သားချောင်းတွေ ကြားကနေ ဝိုင်းအပြင်က လမ်းပေါ်ကို လှမ်းကြည့်နေတာဗျ။
ဝပ်ထရိန်း ဝပ်ထရိန်း ဝပ်ထရိန်း
နွားသံကတော့ တော်တော်ကို အကောင်ကြီးမယ့်ပုံပဲဟ၊ ဒါပေမယ့် ငါလည်း ဘာနွားမှ မမြင်ပါဘူး ငွေစ်ိန်ရာ။
လမသာတော့လည်း မှောင်နေတာကိုး၊ ကိုဥာဏ်ရဲ့ ဘယ်မြင်လိမ့်မတုံး။
ဝပ် ထရိန်း
ဟော အသံက တဖြည်းဖြည်း ဝေးသွားပြီဗျို့။ တောင်ဘက်ကို အသံကရောက်ရောက် သွားတယ်။
ဝုတ် ဝုတ် ဝုတ် ဝုတ်၊ အီ အီ အီ
ဝုတ် ဝုတ် ဝုတ် ဝုတ် ကိန် ကိန်
တောင်ပိုင်းမှာတော့ ခွေးသံတွေ ဆူညံသွားတာဗျို့။ ခွေးတစ်ကောင်ရဲ့ မချိမဆံ့ အော်လိုက်တဲ့အသံလည်း ကြားလိုက်ရတယ်။
ခွေးဟောင်သံ ဆိုတာလည်း အမျိုးမျိုး ရှိတယ်ဗျ။ မြွေတွေ့လို့ ဟောင်တဲ့အသံကတစ်မျိုး၊ ခွေးတစ်ကောင် နယ်ကျွံလာလို့ဟောင်တဲ့အသံကတစ်မျိုး၊ နာနာဘာဝမကောင်းဆိုးဝါးကို တွေ့လို့ဟောင်တဲ့အသံကတစ်မျိုး၊ လူကိုဟောင်တဲ့အသံကတစ်မျိုးဗျ။
အခုကြားနေရတဲ့ ခွေးဟောင်သံကတော့ နယ်ကျွံလာတဲ့ ခွေးကိုဟောင်တဲ့အသံမျိုးဗျ။ ကျုပ်စိတ်ထင်တော့ စောစောက အသံကြားရတဲ့နွားကို ဟောင်တာပဲဖြစ်ရမယ်။ ခွေးတစ်ကောင်တစ်လေက နွားရဲ့နောက်ကို ပြေးလိုက်လို့ နွားကန်လိုက်တာ ထင်တယ်ဗျ။ ခွေးတစ်ကောင် မချိမဆံ့အော်တဲ့အသံ ကြားလိုက်ရတယ်။
အဘနဲ့အမေက ချက်ခြင်းပြန်အိပ်လို့ မပျော်ကြတော့ ဆေးလိပ်ထိုင်သောက်နေကြတယ်။ လူကြီးဆိုတာကလည်း ခက်သားဗျ။ ညဘက်အချိန်မဟုတ်ဘဲ နိုးသွားရင် ချက်ခြင်းပြန်အိပ်လို့ မပျော်တော့ဘူးလေဗျာ။
ဖုန်း ဖုန်း ဝုတ် ဝုတ် ဝူး ဝူး ဝူး ကိန် ကိန်
ဟဲ့နွား ဟဲ့ဘယ်ကနွားတုံး၊ နွားတွေ့လား၊ တွေ့တော့ မတွေ့ဘူး
ဟော ခွေးသံတွေကော လူသံတွေကော ဆူညံနေပါလား ကိုဥာဏ်၊ ဟဲ့ တာတေ နိုးလား
နိုးတယ် အမေ ကျုပ်လည်း နားစွင့်နေတာ၊ ဘာဖြစ်တာလည်း မသိဘူးဗျ၊ လူသံတွေပါ ကြားလာတယ်။
အေး ဟုတ်တယ်၊ လူသံတွေ များလာပါလား ကိုဥာဏ်၊ ဘာတွေဖြစ်ကုန်ပြီတုံး မသိဘူးတော့။
ကျုပ် သွားကြည့်လိုက်ရမလား အမေ
ဟာ မသွားနဲ့ တာတေ၊ ဘာဖြစ်မှန်းမသိတာ မဟုတ်ဘူး၊ မနက်ကျတော့ အကြောင်းစုံ သိမှာပေါ့။
အမေ ဟန့်လိုက်တာနဲ့ ကျုပ်မသွားဖြစ်တော့ဘူးဗျ။ ရာသီကလည်း ဆောင်းဝင်စဆိုတော့ အညာမှာ အေးစပြုနေပြီလေဗျာ။ အပြင်မှာတော့ တော်တော်လေးအေးနေပြီ။ ဒါကြောင့် ကျုပ်လည်း မသွားဖြစ်တော့တာပါ။
ဝုတ် ဝုတ် ဝုတ် ဝုတ်
ခွေးဟောင်သံတွေကတော့ နည်းနည်းကျဲသွားပြီဗျ။ အမေနဲ့အဘရော ကျုပ်ရော နားစွင့်နေကျတုန်းဗျ။
ကိုကြီးတာတေ ကိုကြီးတာတေ
ဟဲ့ တာတေ၊ နင့်ကို လာခေါ်နေတာ ဘယ်သူတွေတုန်း။
အသံကြားလိုက်တာနဲ့ ကျုပ် တန်းသိတယ်ဗျ။ ကျောက်ခဲအသံလေဗျာ။
ကျောက်ခဲဗျ အမေရ၊ ဒီကောင် ကိစ္စတော့ ရှိလာပြီ ထင်တယ်။
ကျုပ်လည်း သုံးတောင့်ထိုး ဓါတ်မီးကို ဆွဲပြီး ဝိုင်းထဲ ဆင်းလာခဲ့တယ်။
ဟေ့ကောင်ကျောက်ခဲ၊ လာ လာ ဝင်ခဲ့၊ ဘာတွေ ဖြစ်တာတုံးကွ။
ကျောက်ခဲနောက်မှာ သံမဏိပါ ပါလာတာဗျ။ ဒီကောင်နှစ်ကောင်လည်း ချမ်းလို့ လက်ကလေးတွေ ပိုက်ပြီး ကုတ်ကုတ်ကလေးတွေကို ဖြစ်နေတာဗျ။
ကိုကြီးတာတေ၊ ကိုလူကျော် သေသွားပြီဗျ။
ဘာ လူကျော် သေပြီဟုတ်လား၊ ငါ့သူငယ်ချင်း လူကျော်လေ
ဟုတ်တယ်ဗျ
ဟေ ဘာဖြစ်လို့ သေတာတုန်း၊ ညနေကတောင် ငါနဲ့တွေ့သေးတာပဲ အကောင်းကြီးပါ။
ကိုကြီးတာတေ၊ စောစောက နွားတွန်သံကြီး မကြားဘူးလားဗျ။
အေး ကြားတယ်လေ၊ ဘယ်သူ့နွားလွတ်နေတာတုန်း။
အဲ့ဒီနွားဝှေ့လို့ ကိုလူကျော် ပွဲချင်းပြီး သေသွားတာဗျ။
ဟေ ဟုတ်လားကွ၊ ဒါ ဘယ်သူ့နွားတုန်း။
ဘယ်သူ့နွားမှ မဟုတ်ဘူး ကိုကြီးတာတေ၊ နွားကို မြင်ကို မမြင်ရတာဗျ။
ဘယ်လိုကွ၊ကျောက်ခဲရ နွားကို မမြင်ရဘူး ဟုတ်လား။ နွားက လူကို ဝှေ့ပစ်ခဲ့ပြီး ထွက်ပြေးသွားလို့လား။
မဟုတ်ဘူးဗျ ကိုကြီးတာတေရ၊ နွားက အသံပဲကြားနေရတာ မြင်ကိုမမြင်ရဘူး။
ဟာ ဟုတ်လား၊ အေး ငါ့အဘလည်း ပြောတယ်ကွ၊ စောစောက သူထကြည့်တာ နွားမတွေ့ဘူးတဲ့။
ဟုတ်တယ်ဗျ နွားက ကိုကြီးတာတေတို့ဘက်ကနေ တောင်ပိုင်းကို ရောက်လာတာ။ ကိုလူကျော်တို့ ဝိုင်းရှေ့ရောက်တော့ ဝိုင်းတံခါးက ဟနေတာတဲ့ဗျ။ ဝိုင်းထဲက ခွေးတွေက ထွက်လာပြီး ဟောင်တော့ နွားက ခွေးနောက်ကို ပြေးလိုက်ရင်း ဝိုင်းထဲရောက်လာတာဗျ။ ဝိုင်းထဲရောက်တော့ နွားထားတဲ့ တင်းကုတ်ဘက်ကို သွားလို့ နွားတွေကလည်း နှာတေမှုတ် ရုန်းကန်လုပ်၊ခွေးတွေကလည်း ဝင်ဆွဲကြတော့ အဲ့ဒီနွားက ကိုလူကျော်တို့ ခွေးညိုကြီးကို ဆောင့်ကန်လိုက်တာ၊ ခွေးလည်း ဆန့်ငင် ဆန့်ငင်နဲ့ တစ်ခါတည်းကို သေတာတဲ့ဗျ။
ဟေ ဒါကြောင့် ခွေးတစ်ကောင် မချိမဆံ့အော်တဲ့အသံမျိုး ကြားရတာကိုး။
ဒီတော့ ကိုလူကျော်ရော သူ့အဘရော ဝိုင်းထဲ ပြေးဆင်း လာကြတာပေါ့ဗျ။ အဲ့ဒီမှာတင် ဝပ် ထရိန်း ဝပ် ထရိန်း ဆိုတဲ့အသံကြီး နှစ်ချက်ဆင့် တွန်လိုက်ပြီး ကိုလူကျော်ကို ပြေးဝှေ့တာတဲ့ဗျာ၊ ကိုလူကျော် အပေါ်ကို ငါးပေလောက် မြောက်တက်သွားပြီမှ မြေကြီးပေါ်ကို ခြေပစ်လက်ပစ် ပြုတ်ကျတာ လှုပ်ကို မလှုပ်တော့ဘူးတဲ့ဗျာ။
ဟာ ပွဲချင်းပြီး သေရောလား။
သေဆို ရင်ဘတ်မှာ ပေါက်နေတဲ့ နွားချိုရာကြီးက နှစ်လက်မလောက်ကို ရှိတာဗျ။ သွေးတွေမှ အိုင်ထွန်းနေတာ မြင်လို့ကိုမကောင်းပါဘူးဗျာ။
လူကျော်ဆိုတာ ကျုပ်သူငယ်ချင်းပဲလေ၊ကျုပ်ဘယ်မှာ စိတ်ကောင်းနိုင်မတုံးဗျာ၊ ကျောက်ခဲတို့ သံမဏိတို့နဲ့ ကျုပ်ချက်ခြင်း လိုက်လာခဲ့တယ်။ လူကျော်တို့ ဝိုင်းထဲမှာ လူကိုအုံနေတာဗျို့။
ကျုပ်တို့ ထနောင်းကုန်းသူကြီးနဲ့ ဆယ်အိမ်ခေါင်းတွေလည်း ရောက်နေကြပြီဗျ။ ဝိုင်းထဲမှာ အောက်လင်းဓါတ်မီးတစ်လုံး ထွန်းထားတယ်။ လူကျော့်အလောင်းက ပက်လက် ဆန့်ဆန့်ကြီးဗျ။ ရင်အုံမှာ နွားချိုရာကြီးဗျို့၊ လုံးပတ်ကနှစ်လက်မလောက် ရှိမယ်။ သွေးတွေက အခုထိ စီးထွက်နေတုန်းဗျ။ ဟာ ဇောင်းလျားပင်အောက်က လူကျော့်ခွေးညိုကြီးဗျ။ ဆန့်ဆန့်ကြီသေနေတာ။ ကျုပ်တို့ရွာထဲကလူတွေက ညိုကြီးကို လက်နဲ့ စမ်းကြည့်နေကြတယ်။
နံရိုးတွေ အကုန်လုံး ကျိုးနေတာကွ၊တော်တော်ကို ပြင်းတဲ့ ကန်ချက်ပဲ။
ညိုကြီးကို မမြင်ရတဲ့နွား ကန်သွားတာလေဗျာ။ လူကျော့်ကိုလည်း မမြင်ရတဲ့နွားကပဲ ဝှေ့သတ်သွားတာပေါ့ဗျာ။ ကျုပ်တို့ရွာမှာ ဖြစ်လိုက်ရင် အဆန်းကြီးပဲဗျ။
ဝုတ် ဝုတ် ဝုတ် ဝပ်ထရိန်း ဝပ် ထရိန်း
ဟာ အရှေ့ပိုင်းကို ရောက်သွားပြီဟေ့။ ခွေးသံတွေရော နွားသံကြီးတွေရော ကြားတယ်ကွ။
ကိုဘမောင်ဆိုတဲ့လူက ထပြောလိုက်တာဗျ။ ကျုပ်ဘာလုပ်ရမယ်ဆိုတာ တွေးမိသွားပြီဗျို့။ ကျုပ် ချက်ခြင်းအိမ်ပြန်လာတယ်။ ကျောက်ခဲတို့နှစ်ယောက်ကလည်း ကျုပ်နဲ့ ထပ်ချပ်မကွာပဲဗျ။ အိမ်ရောက်တော့ အဘတို့ အမေတို့ကို အကျိုးအကြောင်း ပြောပြလိုက်တယ်။
ဟာ ဖြစ်မှဖြစ်ရလေဟယ်၊လူကျော်သေပါပေါ့လားလို့ အမေကပြောပြီး မျက်ရည်သုတ်တယ်။ အဘတို့အမေတို့က ကျုပ်သူငယ်ချင်းတွေကိုဆိုရင် လွှတ်ခင်တာဗျ။
ကျုပ်လည်း ဆေးလွယ်အိတ်ကိုယူပြီး မျက်ကွင်းဆေး ကွင်းလိုက်တယ်။ လွယ်အိတ်ထဲက ခြေမန်းကွင်းကိုရှာပြီး အပေါ်ဆုံးမှာတင်ထားလိုက်တယ်။ ယူလို့လွယ်အောင်ပေါ့ဗျာ။ ကျုပ်ကဆေးလွယ်အိတ်ကို စလွယ်သိုင်းထားလိုက်တယ်။
ကဲ ကျောင်ခဲနဲ့သံမဏိ၊ရွာအရှေ့ပိုင်းကို သွားကြစို့ကွာ။
ကျုပ်က ရှေ့ကထွက် ဒီကောင်နှစ်ကောင်က နောက်က ကပ်ပါလာရောဗျ။
တာတေ နင် သတိဝီရိယလည်း ထားဦးနော်
အမေက ကျုပ်ကို လှမ်းအော်ပြောတာဗျ။ ကျုပ်တို့သုံးယောက် ရွာအရှေ့ပိုင်းကိုရောက်တော့
ဘုန် ဘုန်း ဘုန်း ဗြင်း ဗြင်း
ဘုန်း ဘုန်း ဆိုတာက အိမ်ဝိုင်းထောင့်မှာ စိုက်ထားတဲ့ ငှက်ပျောပင်တွေကို ဝှေ့နေတာဗျ။ ဗြင်း ဗြင်း ဆိုတာက ငှက်ပျောပင်တွေနားက မန်ကျည်းပင်ကြီးကို ကိုယ်လုံးနဲ့ပွတ်တဲ့ အသံဗျ။
ဟာ တွေ့ပြီဗျို့ တွေ့ပြီ။
နည်းတဲ့အကောင်ကြီးမှ မဟုတ်တာဗျာ။ နွားနက်ကြီးဗျ၊အရပ်က ကျုပ်တစ်ရပ်ထက်တောင် မြင့်သေးတယ်ဗျို့။ခေါင်းကြီးက ခွဲတောင်းတစ်လုံးလောက် ရှိတယ်။ ချိုကြီးတွေက နှစ်လက်မ ရေပိုက်လောက် ရှိတာဗျို့။ ဒီချိုနဲ့ ကျုပ်သူငယ်ချင်း လူကျော်ကို ပွဲချင်းပြီး ဝှေ့သတ်ခဲ့တာပေါ့ဗျာ။
ကျုပ် သေသေချာချာ သိသွားပြီ။ ကျုပ်ဆရာကြီးတွေနဲ့လိုက်တုန်းက မှတ်သားထားဖူးတဲ့ ဗဟုသုတအရဆိုရင် ဒါတိုက်နွားကြီးဗျ။ သူ့ကိုစီရင်တဲ့ဆရာ သေသွားလို့လား၊ ဒါမှမဟုတ်ရင် မနိုင်တော့လို့ လွတ်ကျန်ရစ်ခဲ့တာလားတော့ မသိဘူးဗျ။
ကျုပ်လည်း ခပ်လှမ်းလှမ်းကနေပဲ အကဲခတ်နေရတာဗျို့။ အနားကိုတော့ သိပ်မကပ်ရဲဘူးလေဗျာ။ ခုနကလေးတင် ကျုပ်သူငယ်ချင်းလူကျော်ကို ဝှေ့သတ်ထားတဲ့ နွားလေဗျာ။ ကျုပ်ဘယ်လိုလုပ်ပြီး အနားကို ကပ်ရဲမှာလဲ။
ကျုပ် ဆေးလွယ်အိတ်ထဲက ဆရာနွံဖပေးထားတဲ့ ခြေမန်းကွင်းကို ထုတ်ယူလိုက်တယ်။ ခြေမန်းကွင်းကို တစ်ဆင့် ထပ်ဖြည်လိုက်တယ်။ ခြေမန်းကွင်းအကျယ်ကြီး ဖြစ်သွားတယ်။ ဒါမှ တိုက်နွားကြီးရဲ့ခေါင်းကို စွပ်လို့ရမှာလေဗျာ။
ရှူး ရှူး ရှူး
တိုက်နွားကြီး နှာရှုတ်တဲ့အသံဗျ။ ခွဲတောင်းလောက်ရှိတဲ့ ခေါင်းကြီးနဲ့၊ နှစ်လက်မလောက်ရှိတဲ့ ချိုကားကြီးက ဝှေ့ကာဝှိုက်ကာနဲ့ လှုပ်ရမ်းနေတာဗျို့။ မျက်လုံးနီကြီးနှစ်လုံးကလည်း မှောင်ထဲမှာ ရဲတောက်နေတာဗျ။ မှောင်ထဲမှာ လိုက်ကြည့်ပြီး သူ့ရဲ့ရန်သူကို လိုက်ရှာနေတဲ့ပုံပဲဗျ။
ကျုပ်နဲ့ ကျောက်ခဲတို့နှစ်ယောက်က ကပ်လျက်ဝိုင်းကြီးရှေ့က ထနောင်းပင်ကြီးနောက်မှာ ကပ်ပြီးကြည့်နေရတာဗျ။
ဘုတ် ဘုတ် ဘုတ် ဘုတ် ဖူး ဖူး ဖူး
ဟော တိုက်နွားကြီးက ရန်သူရဲ့အငွေ့အသက်ကို ရသွားတဲ့ပုံပဲဗျ။ မြေကြီးကိုခွာနဲ့ တဘုတ်ဘုတ် ယက်နေတယ်။ နှာခေါင်းကလည်း တဖူးဖူး မှုတ်နေတယ်။
ဗြင်း ဗြင်း ဗြင်း ဗြင်း
သူ့ကိုယ်လုံးကြီးကလည်း မန်ကျည်းပင်ကြီးကို တဗြင်းဗြင်းနဲ့ ပွတ်နေသေးတာဗျ။
ဒီတိုက်နွားကြီးရဲ့ခေါင်းကို ဒီခြေမန်းကွင်းစွပ်ဖို့ဆိုတာ မလွယ်လောက်ဘူးလို့ ကျုပ်ထင်တယ်ဗျ။
ဒီခြေမန်းကွင်းကြီးကို သူ့ခေါင်းက စွပ်မချခင်မှာပဲ သူ့ချိုဖျားမှာ ကျုပ်အသက်ပါသွားမှာ သေချာတယ်။ ဒီအတိုင်းလွှတ်ထားလို့ကလည်း မဖြစ်ပြန်ဘူး။ မနက်မိုးမလင်းခင် ကျုပ်တို့ရွာသားတွေ ဘယ်နှယောက် ထပ်သေမယ်ဆိုတာ ဘယ်လိုမှ မပြောတတ်ဘူးဗျ။
ကျောက်ခဲနဲ့သံမဏိက ကျုပ်ကို အကဲခတ်ပြီး ကြည့်နေတာဗျ။ သူတို့ကတော့ နွားကြီးကို ဘယ်မြင်မှာတုံးဗျာ။ အသံပဲကြားနေရတာပေါ့။
ကိုကြီးတာ မြင်လား
ကျောက်ခဲက ကျုပ်ကိုလေသံနဲ့ မေးတာဗျ။ ကျုပ်က ခေါင်းညိတ်ပြလိုက်တယ်။
အကောင်ကြီးလား
ငါ့အရပ်ထက်မြင့်တယ်။ ခေါင်းက ခွဲတောင်းလောက် ရှိတယ်။
ဟာ ဖြစ်ပါ့မလား ကိုကြီးတာတေ၊ မဖြစ်ရင်တော့ မလုပ်နဲ့ဗျာ။ တော်ကြာ ကိုကြီးတာတ အန္တရာယ် ဖြစ်နေဦးမယ်။
ကျုပ်က ကျောက်ခဲကို လက်ကာပြလိုက်တယ်။ ကျုပ်ဘာလုပ်ရင် ကောင်းမလဲ တွေးလိုက်တယ်။ ကျုပ် မဖဲဝါကို သတိရသွားတာဗျ။ ကျုပ်လွယ်အိတ်ထဲက ကတ္တီပါအိတ်ကလေးကို ယူလိုက်ပြီး မဖဲဝါရဲ့ ကိုယ်ပွားအရုပ်ကလေးကို ကျောက်ခဲတို့မမြင်အောင် ထုတ်လိုက်တယ်။
ကဲ မင်းတို့နှစ်ယောက် ဟိုသရက်ပင်ကြီးနောက်မှာ သွားနေ။ဖြည်းဖြည်းလေးသွား၊မင်းတို့ကို နွားကြီးမြင်သွားရင် မလွယ်ဘူး။ ဒီကောင်နှစ်ကောင် ရွေ့တယ်ဆိုရုံလေးရွေ့ပြီး သရက်ပင်ကြီးနောက်မှာ ကပ်နေကြတယ်။
သင်္ချိုင်းရှင်မ မဖဲဝါခင်ဗျား၊ထနောင်းကုန်းက တာတေ ပင့်ဖိတ်ပါတယ်။ လွှတ်အရေးကြီးနေလို့ ခုချက်ခြင်းကြွပါဗျာ။
ကျုပ်ကတိုးတိုးလေးပြောပြီး မဖဲဝါကို ပင့်လိုက်တယ်။ ဟော လှုပ်လာပြီ လှုပ်လာပြီ။ ကျုပ်လက်ထဲမှာ ဆုပ်ကိုင်ထားတဲ့ မဖဲဝါရဲ့ ကိုယ်ပွားရုပ်ကလေး လှုပ်လာပြီဗျို့။
မဖဲဝါရဲ့ကိုယ်ပွားရုပ်ကလေးမှာ အသက်ဝင်လာပြီဆိုတာ ကျုပ်သိလိုက်တယ်။
သင်္ချိုင်းရှင်မကြီး မဖဲဝါခင်ဗျား ဒီတိုက်နွားကြီးကို ကျုပ် ခြေမန်းကွင်းစွပ်မှ ဖြစ်မယ်။ဒီတိုက်နွားကြီးက ကျုပ်တို့ရွာသားတစ်ယောက်ကို သတ်လိုက်တယ်ဗျာ။ လွှတ်ထားရင် နောက်ထပ်လူတွေ ထပ်သတ်ဦးမှာသေချာတယ် မဖဲဝါ။ ကျုပ်ဆရာကြီးတွေ လုပ်သလို ခြေမန်းကွင်းစွပ်ပြီး မူလပြန်မှဖြစ်မယ်ဗျ။
ကျုပ်လက်တစ်ဖက်က မဖဲအရုပ်ကလေးကိုကိုင်ရင်း ခြေမန်းကွင်းကို ကျုပ်သေသေချာချာ ပြင်ပြီးကိုင်လိုက်တယ်။ ဒီတုန်းမှာပဲ ကျုပ်လက်ထဲက မဖဲဝါရဲ့ ကိုယ်ပွားရုပ်ကလေးက ဆတ်ကနဲလှုပ်သွားပြီး အရုပ်ကနေ ဖြူဖြူတန်းတစ်ခု ပြေးထွက်သွားတယ်။ ဟာ မဖဲဝါ တက်နွားကြီးကို ကားယားကြီး ခွစီးထားတယ်။ ဟာ နွားက ရုန်းနေပြီဗျို့။ သူ့ကို ခွစီးထားတဲ့ မဖဲဝါကြီးကို ခါချနေတာဗျ။ အရပ်ဆယ်ပေလောက်ရှိတဲ့ မဖဲဝါကြီးကလည်း ဆံပင်ဖားလျားကြီး ချလို့ဗျ။
ဟော ဟော တိုက်နွားကြီးက သူ့လည်ပင်းကိုကွေးပြီး သူ့ကိုယ်ပေါ် ခွစီးထားတဲ့ မဖဲဝါကို ချိုကြီးနဲ့ ဝှေ့နေတယ်ဗျ။ ကျုပ်ကတော့ ထနောင်းပင်ဘေးကထွက်ပြီး အဆင်သင့် ရပ်နေလိုက်တယ်။
ဟာ တိုက်နွားကြီး ကျုပ်ကို မြင်သွားပြီဗျို့။
ဝပ် ထရိန်း ဝပ် ထရိန်း
အသံနက်ကြီးနဲ့ နှစ်ချက်ဆင့်တွန်လိုက်တာဗျ။
ဘုတ် ဘုတ် ဘုတ်
တိုက်နွားကြီးက မြေကြီးမှာ ခွာယက်နေတယ်ဗျ။ ကျုပ်ဆီကို ပြေးဝင်တော့မယ့်ပုံပဲဗျ။ ကျုပ်လည်း ခါးကိုကုန်းပြီး အသင့်ပြင်ထားတယ်။ နွားရဲ့အာရုံက ကျုပ်ဘက်ကို ရောက်လာတုန်းမှာ မဖဲဝါရဲ့လက်ကြီးတစ်ဖက်က လေထဲကို မြောက်တက်သွားပြီး
ဘုန်း ဘုန်း ဘုန်း
နွားကြီးရဲ့ ကျောကုန်းကို သုံးချက်တိတိ ဆက်ရိုက်ချလိုက်တယ်ဗျို့။
တိုက်နွားကြီးကလည်း ကျောကုန်းကြီး ကော့ထွက်သွားရောဗျို့။ဒါ အခွင့်အရေးပဲ။ပြေးပြီ။ ကျုပ် ပြေးပြီ။ ကျုပ်ခုန်လိုက်ပြီ။စွပ်ပြီ။ခြေမန်းကွင်းကို မိမိရရကို စွပ်ချလိုက်ပြီဗျာ။ ကျုပ်စွပ်လိုက်တဲ့ ခြေမန်းကွင်းကြီးက နွားကြီးရဲ့လည်ပင်းမှာ တွဲလောင်းကြီးဗျ။ ဟော နွားက ခေါင်းငုံ့ပြီး ခါချနေတယ်ဗျို့။
ဘုန်း
မဖဲဝါ နောက်တစ်ချက် ထပ်ရိုက်လိုက်တယ်။ ဟာ နွားကြီး ငြိမ်သွားပြီဗျို့။နွားကြီး တဖြည်းဖြည်း သေးလာပြီဗျို့။ ဟာ နွားသိုးအရွယ် ရောက်သွားပြီ။ဟော နွားပေါက်ကလေး အရွယ်ရောက်သွားပြီ။ဟော ပျောက်သွားပြီဗျို့။
ကျုပ် မြေကြီးပေါ် ငုံ့ကြည့်လိုက်တော့ ကျုပ်စွပ်ထားတဲ့ ခြေမန်းကွင်းကြီး အလယ်မှာ နွားရုပ်ကလေးဗျ။
ရွှံ့နဲ့လုပ်ထားတာလား သစ်စားနဲ့လုပ်ထားတာလားတော့ ကျုပ်မသိဘူးဗျ။ ကျုပ်က ကျုပ်ဆရာကြီးရဲ့ ခြေမန်းကွင်းကို ကောက်ယူလိုက်တယ်။ဟာ မဖဲဝါရဲ့လက်ကြီးတစ်ဖက်က နွားရုပ်ကလေးကို ကောက်ယူလိုက်တယ်ဗျို့။
ဟော ပျောက်သွားပြီ၊မဖဲဝါ ပျောက်သွားပြီဗျို့။ကျုပ်က ခြေမန်းကွင်းကို သေသေချာချာခွေပြီး လွယ်အိတ်ထဲမှာ ထည့်သိမ်းလိုက်တယ်။ ပြီးတော့ မဖဲဝါရဲ့ကိုယ်ပွားရုပ်ကိုလည်း သိမ်းလိုက်တယ်။
ကျုပ် နောက်ကိုလှည့်လိုက်တာနဲ့ ကျောက်ခဲနဲ့သံမဏိက ကိစ္စပြီးသွားပြီဆိုတာ သဘောပေါက်ပြီး သရက်ပင်ကြီးနောက်ကနေ ပြေးထွက်လာကြတယ်ဗျ။
ကိုကြီးတာတေ နွားကြီးရော၊နွားကြီးရှိသေးလားဗျ
ကျုပ်က ခေါင်းခါပြပြီး ပြောလိုက်တယ်။ အောက်လမ်းဆရာတစ်ယောက် လွတ်ကျန်ခဲ့တဲ့ နွားရုပ်ကလေးပါကွာ
ဟင် ဘယ်မှာတုံး
မဖဲဝါ သိမ်းသွားပြီကွ
ဗျာ မဖဲဝါကြီး ရောက်လာတာလား ကိုကြီးတာတေ။
အေး ဟုတ်တယ်။ ငါပင့်လိုက်တာ၊ငါကဆရာမှ မဟုတ်တာ ကျောက်ခဲရာ ဒီတိုက်နွားကြီးကို ငါတစ်ယောက်တည်း ဘယ်လိုလုပ်နိုင်မှာလဲကွာ။
အဲ့ဒီညက ကျုပ် တစ်ညလုံး မအိပ်ရပါဘူး။ ကျုပ်သူငယ်ချင်း လူကျော်ရဲ့ အသုဘမှာ မိုးလင်းသွားခဲ့တာပေါ့ဗျာ။
တာတေစာအုပ်မှမောင်ရင်မောင်ကူးယူဖော်ပြပါသည်။
Credit to မူရင်း
No comments:
Post a Comment